Col 4 | KSR | STEP | Galeŋurunana oŋoonoŋ Poŋ somata ii Siwe gomanoŋ laligoji, ii moma kotojutiwaajoŋ mono weleŋqeqeurugia yoŋowo wasombura maayanoŋ aoŋ so motooŋgo ama oŋoma laligowu. Kiaŋ.

a1Ef 6.9

b5Ef 5.16

c7Apo 20.4; 2 Tim 4.12

d7-8Ef 6.21-22

e9Flm 10-12

f10Apo 19.29; 27.2; Flm 2-4; Apo 12.12, 25; 13.13; 15.37-39

g12Kol 1.7; Flm 23

h142 Tim 4.10, 11; Flm 24

i17Flm 2

Colossians 4

1 Galeŋurunana oŋoonoŋ Poŋ somata ii Siwe gomanoŋ laligoji, ii moma kotojutiwaajoŋ mono weleŋqeqeurugia yoŋowo wasombura maayanoŋ aoŋ so motooŋgo ama oŋoma laligowu. Kiaŋ. ^a

Qambaŋmambaŋ qaa tosia

2 Qamakooli gawoŋ mono kaparaŋ koma meŋ laligowu. Iikanoŋ mono uugbiligbili laligoŋ jeŋ mepeqepesee ama laligowu. 3 Mepeqepesee ambuti iikanoŋ mono nonoojoŋ kaaŋagadeeŋ kokaeŋ qama kooliŋ laligowu, “Anutu, gii mono Pool neŋauruta kana meŋ oŋona saanoŋ Kraistwaa Buŋa qaa aasaŋgoya ii jeŋ asarigi seiwaa.” Niinoŋ Buŋa gawoŋ mewetiwaajoŋ gbadooŋ noŋgi kapuare mirinoŋ rajeŋ. 4 Niinoŋ Buŋa qaa Anutuwaa siiŋaa so jewe asariwutiwaajoŋ mono qamakooligianoŋ naŋgoŋ noma laligowu.

5 Ejemba uumeleeŋ mende ama seleeŋgeŋ laligojuti ii mono momakooto qaganoŋ ama oŋoma laligowu. Uuwaa gawoŋ mewombaa kana moŋ koloowaati kambaŋ ii mono mende mesoqesooŋ tiwilaawuto, ejemba kooroŋgianoŋ kema bonjoŋ qambaŋmambaŋ koma oŋombu. 6 Qaa amiŋ mobuti, ii mono kambaŋ so siiyawo mindiriŋ iŋijogi naaŋawo kolooŋkeba. Qaa iŋijogi ejemba motomotooŋ siiŋgia kolooro kuuya yoŋoonoŋ qaa nomaeŋ meleema oŋombuti ii mono moma yagoŋ iikawaa so jeŋkebu. Kiaŋ. ^b

Poolnoŋ Tikikus Onesimus wasiŋ orono kawao.

7 Wombo alana Tikikus iinoŋ Pombo qokotaaŋ nama niwo gawoŋa tororo meŋ neŋana kolooja. Iinoŋ oŋoonoŋ kaŋ nomaeŋ ama laligoŋkejeŋi, iikawaa sunduya kuuya iŋijoro mobu. 8 Nomaeŋ ama meŋ rama laligojoŋi, oŋo sundu ii mobutiwaajoŋ wasiŋ mube oŋoonoŋ kawaa. Iinoŋ kaŋ saanoŋ uluŋkoleŋ ama oŋombaa. 9 Kaaŋagadeeŋ wombo alanana Onesimus Kolosi oŋoonoŋga kaŋ Pombaa qaaya pondaŋ otaaŋ meŋ yagoŋkeji, niinoŋ ii wasiwe eleema kawaa. Eja woi yoronoŋ kaŋ kokanoŋ iwoi kuuya nomaeŋ kolooro laligojoŋi, iikawaa sunduya saanoŋ jedaborori mobuya. Kiaŋ. ^{c
,} ^{d
,} ^e

Yeizozo qaa tetegoya

10 Aristarkus niwo kapuare mirinoŋ raji ano Barnabaswaa niwita Maak yoronoŋ yeizozogara jeŋ ani oŋoonoŋ kaja. Maakwaajoŋ qaana kokaeŋ jeŋ kotowe mogi: Oŋoonoŋ kaŋ koubaati eeŋ, ii mono saanoŋ koma horoŋ ala meŋ mubu. 11 Joosua qata moŋ Jastus qajuti iinoŋ kaaŋagadeeŋ yeizozoya jeŋ ano oŋoonoŋ kaja. Neŋaurunanoŋ niwo Anutuwaa bentotoŋaa gawoŋ meŋ laligojuti iyoŋoo batugianoŋ eja karooŋ yoŋonoŋga Juuda ejaga laligoju. Yoŋonoŋ uluŋkoleŋ ama noma laligogi.

12 Aŋgiaanoŋa eja Epafras Kraist Jiisas weleŋ qeŋ muŋkeji, iinoŋ yeizozoya jeŋ ano oŋoonoŋ kaja. Iinoŋ kambaŋ so oŋoojoŋ ama qama kooliŋkeja. Qaa kuuya Anutuwaa jetaa so kolooŋ eji, oŋo iikanoŋ rindaŋgoŋ nama kotiiŋ akadamugiawo kolooŋ laligowutiwaajoŋ aoŋ oroŋkeja. 13 Niinoŋ iwaa kania moma kokaeŋ naŋgoŋ jejeŋ: Iinoŋ oŋo ilaaŋ oŋomambaajoŋ gawoŋ mamaga meŋkeja. Kaaŋagadeeŋ Laodisia ano Hierapolis taoŋ woi kanoŋ moma laariŋ laligojuti iyoŋoojoŋ ama gawoŋ naa afaaŋaga meŋ aoŋ oroŋkeja. 14 Wombo doktanana Luuk ano Deemas yoronoŋ kaaŋagadeeŋ yeizozogia jeŋ ani oŋoonoŋ kaja.

15 Niinoŋ yeizozogia jeŋ oojeŋi, ii mono uumeleeŋ alaurunana Laodisia taonoŋ laligojuti, ii iŋijogi mobu. Kaaŋagadeeŋ Nimfa ano iwaa mirinoŋ kanageso ajorooŋkejuti mono ii iŋijogi mobu. 16 Tere koi weeŋgoŋ oŋoŋgi mogi tegoro iikawaa gematanoŋ ii mono aŋgi Laodisia uumeleeŋ kanageso yoŋoonoŋ keno weeŋgowu. Laodisia yoŋoojoŋ tere moŋ oowe kenoti ii aŋgi oŋoonoŋ karo oŋo ii kaaŋagadeeŋ weeŋgowu. 17 Arkipus eja ii mono kokaeŋ ijogi moba, “Poŋnoŋ Buŋa gawoŋ mewaatiwaajoŋ jeŋ kotoŋ goma koipuga raro laligojaŋi, giinoŋ mono gawoŋ ii romoŋgoŋ kuuya medaborowa.”

18 Pool niinoŋ yeizozogia jeŋ neenaa boronanoŋ qana kokaeŋ oojeŋ: Pool. Oŋo mono kasa gbadonawo nii romoŋgoŋ noma laligowu. Kaleŋmorianoŋ mono oŋowo ewa. Kiaŋ. ^{f
,} ^{g
,} ^{h
,} ⁱ